KIDUNG SING ILANG
Dakambu alas kobong saka alun-alun
pisowanan
ginawa angin wengi saka pasisir tumuju
pagunungan
sawise cahya srengenge sayah ngiring
tembang bocah alasan
krungkeb sangisore ayang-ayang ringin,
ing tengah kutha
ganda bacin nyengrak saka pucuk tugu
pengetan
banjur ili banyu ngirim saglundhung
banjir bandhang
wit-witan pangayom dalan rubuh jinarah
tangan-tangan wesi
sauntara kedhep mripat srengenge abang
mlerah
nyorotake kanepson jaman makantar-kantar
kukus ireng ngendhanu sandhuwure taman
kaputren
kilat thathit guruh bledheg ngakak
ngubengi beteng kuthareja
udan panah binarung rasa kekes sinawat
saka dhasar segara
ngonclang makutha baita, o, mupus
salirik kidung kelasi
dhinampar ngangkrag sandhuwure watu
gilang alas jati
sauntara pucuk lalang nyolong keprawanan
langit
nyingkap klambu wengi, ngajak sepi lunga
ziarah
ing kuburan guritan warisane penyair
kelangan jaya kawijayan
daktemu makuthaning wengi coplok saka
embanan jaman
bareng gugure salembar wulu manuk saka
taman langit
cahya rembulan kaerut ing pakunjaran
lan alas terus bae kobong saoyod-oyode
kukuse kumelun sandhuwure alun-alun
pasowanan
ngrubuhake regol panjagan kabudayan
mutung tumbak piyandel pangukuhe
singgasana kautaman
pinutur gresah angin, tangis ringin, lan
kumepraking jaman
sing pecah ajur mumur kabanting
sungsange kahanan
supradene panggah daklacak kidung sing
ilang
sapa ngerti kaendahan panciptan, bali
maneh manjing guwa garba
jatining girut, wingkising nurani,
lembuting jiwa
manjing ing kasekten jemparing
landheping curiga
nyatane jagad iki wis rinatonan
panjilmaning angkara!
Kapethik saka : Bledheg Segara Kidul (ANTOLOGI
GEGURITAN 1987-2007)
Tidak ada komentar:
Posting Komentar