Aku Nglukis ing Sayuta Langit
Delengen aku nglukis ing sayuta langit
kebak warna abang sing cinipta saka
getih jaman luput ngandhut
banjur nindakake aborsi kanthi nguntal
pil lintang
guguran getihe dakwadhahi genthong
angen-angen kagelan
dene kuwase dakcipta nganggo rambut
gunung njeblug
lan warna-warna endah liyane cinipta
saka pecahan raga
nasib para glandhangan sing kasingkir
merga impen
para pamuja patung adipura
O,
kadang-kadangku sing ora nate bosen nyawang lukisan
delengen
lukisanku ing sayuta langit kae
kebak akrilik
mata nangis, tangan nyandhong, lan sandhangan
pating sranthil!
warna-warnane
banget naturalis awit dumadi saka nyawa-nyawa
sing pecat tanpa
dosa
Ambal Kebumen, Oktober 1996
(Panjebar Semangat. No. 30 – Tanggal 22 Juli 2000)
Tidak ada komentar:
Posting Komentar